.png)
اية هو موقع Fiverr وكيف يعمل وليه يعتبر كنز للجميع؟
في مقال النهاردة هتكلم عن منصة فايفر و الى تعتبر واحدة من اهم منصات العمل الحر على الانترنت و ان مكانتش اهمهم و اقدمهم على الاطلاق ، هتكلم عن المنصة بشكل عام هشرح فكرة عملها، ازاي بتعتبر كنز حقيقي لجميع المتعاملين معاها سواء كانو مقدمين للخدمات ( بياعين) او طالبين خدمات ( مشترين) ، وايه هي مميزاتها وعيوبها، وطرق الدفع واستلام الأموال من خلالها، وو معلومات كتيرة جدا عنها ا، وهتقدر من خلال المقال ده انك تفهم المنصة دي بشكل عميق، وبالتالى هيبقى عندك الأرضية والأساس للتعامل مع هذه المنصة بشكل احترافي سواء لبيع الخدمات أو لشراءها.
ما هو موقع Fiverr
موقع فايفر Fiverr هو ببساطة عبارة عن سوق للخدمات، يعني اي مستخدم إنترنت حول العالم يقدر يعمل حساب على موقع فايفر، و يشتري من خلال موقع fiverr الخدمات او يبيع خدماته للي محتاجها على الموقع . و تقدر تقول على fiverr انه حاجة كدة شبه موقع امازون بس على خدمات مش سلع و ده كلام القائمين على الموقع مش كلامي بالمناسبة . وزيما أمازون هو أكبر متجر إلكتروني للمنتجات و السلع ، فكمان فايفر هو أكبر متجر إلكتروني للخدمات.
في الحقيقة القائمين على فايفر مبيقدموش أي نوع من الخدمات لمستخدمين الموقع ، ولكن فايفر هو آداة أو سوق أو منصة للربط بين مقدمي الخدمات واللى عايزين يشترو الخدمات دي ، بإختصار دور فايفر يتمثل في توفير منصة للجمع بين الطرفين، المنصة دي تحتوي على لوحة تحكم لإدارة الخدمات أو طلبات الشراء،و دور موقع Fiverr انه يوفر قوانين تنظم العمل بين مقدم الخدمة وطالب الخدمة.
تقدر تقول ان فايفر هو مجرد وسيط ينظم سوق الخدمات الكبير جدا ده ، وهو طبعا مش بيعمل كدة ببلاش لا ده بياخد مقابل عبارة عن عمولة %20 عن كل عملية شراء ناجحة. ولازم هنا نوضح أن العمولة اللى بياخدها فايفر بيتم خصمها من مقدم الخدمة مش من مشتري الخدمة ، ويعني مثلا:
انا ببيع خدمة ترجمة المقالات على فايفر وليكن بقدم خدمات الترجمه بتاعتي ب 100 $
انت عندك مقال مكتوب بالانجليزي و عايز تترجمه و اتفقت معايا على ده
انا ترجمت المقال و بعتهولك و انت عجبك الشغل و تمام فدفعت ال 100 $
هيحجز موقع فايفر مبلغ 20 دولار مقابل خدمة الوساطة وتوفير نظام رائع للطرفين، وال 80 دولار هيتم تحويلها لحسابي .
و لازم نعرف ان الخدمة على موقع فايفر تسمي ب Gig، و انت كمتطلع للعمل على Fiverr لازم تعمل Gig، واللي من خلالها هتحط كل المعلومات عن الخدمة اللى تقدر و ناوي تقدمها ، و طبعا تقدر كبائع للخدمات على فايفر تعمل كذا Gigs. فتقدر ككاتب مثلاً عمل Gig لكتابة المقالات باللغة العربية، وواحدة أخرى لكتابة المقالات باللغة الإنجليزية و هكذا
التسجيل على موقع fiverr
زي ما شرحنا قبل كدة ان موقع فايفر هو عبارة عن وسيط بين مقدم او بائع للخدمة و مشتري للخدمة فطبعا فيه نوعين من التسجيل للموقع اما هتسجل كمشتري buyer او هتسجل كبائع للخدمة seller
لو هتسجل كمشتري buyer فيه شوية معلومات يهمك تعرفها هقولهالك بسرعة كدة :
- عشان تشتري خدمة من موقع فايفرلازم الاول طبعا يكون عندك حساب بالموقع، و الحساب ده هيخليك تقدري تشتري و تكمل خطوات الشراء و تتواصل مع مقدم الخدمة او البائع و كمان هتقدر تتحكم في عملية الدفع
- في نظام للتواصل بين البائعين والمشترين، هتقدر من خلال النظام ده انك تتواصل مع مقدمين الخدمات عشان لو عندك الأسئلة أوعشان تعرف معلومات اكتر ، أو حتى عشان تتأكد من قدرتهم على تنفيذ المهمة المطلوبة قبل شراءها.
- يمكنك كمشتري تصفح الخدماتزي مانت عايز و تشوف عنوان الخدمه ووصفها، وعدد مرات شراءها قبل كدة ، وتقييم العملاء السابقين لها.
- فيه نظام متقدم للبحث في الخدمات وفقاً لتصنيفات عامة وأخرى فرعية، وهتقدر تفلتر النتائج طبقا لحاجات كتير منها اللغة والسعر ودرجة التقييم…الخ.
- هتقدر تشتري الخدمات من فايفر عن طريق حساب باي بال أو عن طريق الكارت الائتماني
و عشان تسجل على موقع fiverr كمشتري كل الى محتاجه انك تدخل على الموقع www.fiverr.com
لو هتسجل على الموقع كمقدم خدمة او بايع و ده الى يهمنا لازم تعرف شوية معلومات مهمة بردو :
- عشان تقدر تبتدي تبيع خدماتك على فايفر لازم تقوم بإنشاء حساب، بس اضافة لكدة لازم كمان تعمل Gigs الخاصة بك.
- فايفر بيسمح لك بإنشاء عدد 7 Gigs كبائع جديد، وبيرتفع العدد وفقاً لرتبتك في الموقع.
- لكل بائع على فايفر رتبة، وبتتحدد الرتبة دي وفقاً لتاريخ هذا البائع على الموقع ومستوى تقييمه.
- بعد انتهاء عملية البيع بنجاح هيعلق موقع فايفرالمبلغ المستحق لك كبائع لمدة 14 يوم، وبعدهاهتقدر تسحبه حسب طريقة الدفع اللى بتفضلها،عشان لو مشترى الخدمه حب يعمل شكوى او استرجاع او اي حاجة بيبقى خلال ال14 يوم دول
- هتقدر تستلم اموالك من فايفر عن طريق PayPal أو من خلال حسابك البنكي المحلي.
- بعد كل عملية بيع ناجحة هيقوم المشتري بتقييم خدمتك وفقاً لدرجة الرضى اللي حصل عليها من خلال عملك.
و عشان تعمل حساب بائع على موقع فايفر هتقوم بزيارة الرابط :
اية هي الخدمات اللى تقدر على بيعها/شراءها في Fiverr
زي ما قلنا قبل كدة ان فايفر هو أكبر سوق للخدمات على شبكة الإنترنت، والخدمات دي ممكن تكون أي شيء تتخيله. الفكرة هنا تقوم على المبدا التالى :
“طالما تمتلك شيء يمكنك تقديمه للآخرين كخدمة، وهناك من يريد شراء هذا الشيء، فيمكنك الربح وتحقيق النجاح من خلال فايفر”
في الحقيقة ده مش معناه أن فايفر هو موقع عشوائي، و مفيش له نظام وفكر لتنظيم الخدمات ووضعها في تصنيفات معينة بالعكس تماما لأن في فايفر فيه تسع تصنيفات رئيسية تندرج تحتها كل الخدمات، . يندرج تحت كل تصنيف من التصنيفات ال 9 العديد والعديد من التصنيفات الفرعية الأكثر تخصصاً.
وهذا شرح للتصنيفات ال 9 الرئيسية في موقع Fiverr:
1- Graphics & Design (الجرافيك والتصميم)
وفيه هتلاقي كل الخدمات الخاصة بالرسوم والصور والتصميمات والانفوجرافيك. و في القسم ده بيندرج تحته أكبر عدد من الأقسام الفرعية.
2- Digital Marketing (التسويق الرقمي)
وهتلاقي فيه كل الخدمات الخاصة بالتسويق الرقمي بدءاً من خدمات تحسين محركات البحث، مروراً بخدمات الحصول على زوار لموقعك، والتسويق عبر السوشيال ميديا وعبر الاميل انتهاءاً بخدمات كتابة المحتوى.
3- Writing & Translation (الكتابة والترجمة)
في القسم ده هتلاقي كل الخدمات التي لها علاقة بالكتابة والترجمة من وإلى كل لغات العالم.
4- Video & Animation (الفيديو والانيمي)
في القسم ده هتلاقي كل الخدمات الخاصة بتصميم ومونتاج الفيديوهات بكل أنواعها.
5- Music & Audio (الموسيقى وملفات الصوت)
في القسم ده هتلاقي كل الخدمات الخاصة بتسجيل وتعديل ملفات الصوت والخلفيات الموسيقية…الخ.
6- Programming & Tech (البرمجة والتكنولوجيا)
في القسم ده هتلاقي كل الخدمات المتعلقة بالبرمجة والخدمات المرتبطة بالكمبيوتر والتكنولوجيا الحديثة.
7- Business (البيزنس)
وفي القسم ده هتلاقي كل الخدمات المرتبطة بعالم المال والاعمال.
8- Lifestyle (نمط الحياة)
وفي القسم ده هتلاقي هذا يضم كل الخدمات الخاصة بالحياة الإنسانية، وهو يضم أقسام فرعية عن اعطاء النصائح وممارسة الرياضة، والأنظمة الصحية، والترفيه…الخ.
9- Gaming (الألعاب)
في القسم ده و اللى تم اضافته مؤخرا هتلاقي الخدمات المتعلقة بالألعاب الرقمية، وبه هتلاقي خدمات خاصة بعمل وتصميم الألعاب واختبارها وتصميم المؤثرات الخاصة بها…الخ.
في النهاية حابب اقول بس ان ببعض التفكير والمرونة فانت هتقدر تحويل مهارتك الى تمتلكها إلى خدمة على موقع فايفر، وأنت هنا مش تعرض خبرتك او موهبتك لمجموعة من أصدقاءك ومعارفك، ولكن حرفياًهتقدر تعرضها للعالم كله و ده الشيء الرائع في عصرنا لانك تقدر تتعلم أي شيء بكل سهولة من خلال الإنترنت وفي الوقت اللى تحبه ، و ساعات في مقابل مبالغ حقاً لا تذكر،وفي أحيان كثير بيبقى التعلم مجاناً تماماً.عشان كدة لو معندكش الميزة أو المهارة اللى ممكن تحولها لخدمة على فايفر فمعلش مش مشكلة ،اتعلمها و حولها لمصدر رزق و مكسب ليك .
اتمنى يكون الشرح للموقع مفيد و انا هعمل شرح تاني مفصل لكيفية التسجيل عليه بكل خطواتها عشان اسهلها عليكم اكتر و لحد ماعمل الموضوع ده لو حد عنده اي مشكله يسيبها لي في التعليقات و هرد عليها قريب بمشيئة الله
في النهاية حابب اقول بس ان ببعض التفكير والمرونة فانت هتقدر تحويل مهارتك الى تمتلكها إلى خدمة على موقع فايفر، وأنت هنا مش تعرض خبرتك او موهبتك لمجموعة من أصدقاءك ومعارفك، ولكن حرفياًهتقدر تعرضها للعالم كله و ده الشيء الرائع في عصرنا لانك تقدر تتعلم أي شيء بكل سهولة من خلال الإنترنت وفي الوقت اللى تحبه ، و ساعات في مقابل مبالغ حقاً لا تذكر،وفي أحيان كثير بيبقى التعلم مجاناً تماماً.عشان كدة لو معندكش الميزة أو المهارة اللى ممكن تحولها لخدمة على فايفر فمعلش مش مشكلة ،اتعلمها و حولها لمصدر رزق و مكسب ليك .
اتمنى يكون الشرح للموقع مفيد و انا هعمل شرح تاني مفصل لكيفية التسجيل عليه بكل خطواتها عشان اسهلها عليكم اكتر و لحد ماعمل الموضوع ده لو حد عنده اي مشكله يسيبها لي في التعليقات و هرد عليها قريب بمشيئة الله
جميل جدا فعلا 🥰🥰🥰
ReplyDelete